Ата-аналарны нәрсә борчый?

Онлайн форматта узган чарада дистанцион укыту, укучыларны кайнар аш белән тәэмин итү, мәктәпләрне югары тизлекле Интернетка тоташтыру, балаларның сәламәтлеге, коронавирустан вакциналау, агымдагы елда БДИ һәм Төп дәүләт имтиханын оештыру, беренче сыйныфларны мәктәпкә кабул итү кебек мәсьәләләр күтәрелде.

Сорауларга мәгариф һәм фән министры Айбулат Хаҗин, аның урынбасары Илдар Мәүлетбирдин, сәүдә һәм хезмәтләр күрсәтү министры Алексей Гусев, санлы үсеш министры урынбасары Рөстәм Хәмәтвәлиев, сәламәтлек саклау министры урынбасары Игорь Засядкин җавап бирде.

Чараның модераторы педагогика фәннәре докторы, профессор Раил Әсәдуллин булды.
Ата-аналар җыелышына 100дән артык сорау килгән. Билгеле булуынча, сорауларны берничә юл белән бирергә мөмкин иде:
— 14 гыйнвардан электрон почта адресына: [email protected];
— Башкортстан Республикасы Мәгариф һәм фән министрлыгының социаль челтәрләре аша;
— Башкортстан Республикасы Мәгариф һәм фән министрлыгы каршындагы яшьләр советының социаль челтәрләре аша.

Бердәм дәүләт имтиханы ничек узачак?

Гомумреспублика ата-аналар җыелышында Башкортстанның мәгариф һәм фән министры Айбулат Хаҗин быел мәктәп укучылары өчен чыгарылыш имтиханнары ничек узачагы турында сөйләде. Тулаем алганда, аттестация тәртибе Русиянең Мәгариф министрлыгы һәм “Рособрнадзор” тарафыннан игълан ителде.
Югары уку йортларына керү өчен Бердәм дәүләт имтиханының төп этабы 31 майдан июнь ахырына кадәр узачак. 11нче сыйныф укучылары йомгаклау иншасын 1 апрельдә язачак. Шулай ук яз көне укучылар үзләре сайлаган фән буенча бер контроль эш язарга тиеш булачак. Быел чыгарылыш сыйныф укучылары информатика фәненнән БДИны компьютерда тапшырачак.
Быел база дәрәҗәсендәге математика буенча БДИ гамәлдән чыгарыла, ә профильле математиканы вузга керү өчен кирәк булган укучылар гына тапшырачак.
Югары уку йортларына керергә теләмәүчеләргә БДИ урынына урыс теле һәм математиканың база дәрәҗәсе буенча дәүләт чыгарылыш имтиханы (ГВЭ) тапшырырга кирәк булачак.
9нчы сыйныфлар ике мәҗбүри фән – урыс теле һәм математика буенча дәүләт йомгаклау аттестациясе узачак.

Беренче сыйныфка кабул итү кагыйдәләре үзгәрде

Ата-аналарны борчыган сорауларның берсе булачак беренчеләр турында булды.
Агымдагы елда мәктәпләргә беренче сыйныф укучыларын кабул итү кагый­дәләре үзгәрде. Әгәр элек укучыларның әти-әниләреннән гаризалар 1 февральдән кабул ителсә, быел 1 апрельдән баш­ланачак. Яшәү урыны буенчамы-юкмы, бөтен гаризалар да шушы көннән генә кабул ителәчәк һәм 30 июньгә кадәр дәвам итәчәк. Бу хакта мәгариф һәм фән министры урынбасары Илдар Мәүлетбирдин белдерде.

15 марттан да соңга калмыйча мәктәпләргә бер-кетелгән адреслар исемлеге билгеле булырга тиеш. Әлеге документны мәктәп үз сайтында бастырып чыгара.

Әгәр элек мәктәп баланы документлар тапшырылганнан соң, 7 көн эчендә кабул итәргә тиеш булса, яңа тәртип буенча, директор кабул итү турындагы күрсәтмә актны, барлык гаризаларны кабул итү тәмамланганнан соң, 3 эш көне дәвамында, ягъни 30 июньнән соң чыгарачак. Бу учреждениегә беркетелгән территориядә теркәлгән гаиләләргә кагыла. Әгәр беренче сыйныфка баручы баланың абый-апалары шушы ук мәктәпкә укый икән, аңа өстенлекле хокук бирелә.
Ягъни принцип шундый: башта 30 июньгә кадәр барлык гаризалар җыела, аннары боерыклар чыгарыла.

Калган ата-аналар документларны 6 июльдән генә тапшыра ала. Моннан тыш, документлар хәзер электрон рәвештә кабул ителәчәк. Гариза бланкы мәктәп сайтларында урнаштырылачак.

Һәр мәктәпкә — югары тизлекле Интернет

2021 елга республиканың барлык мәктәпләре дә югары тизлекле Интернетка тоташтырыла.
Бу хакта Гомумреспублика ата-аналар җые­лы-шында Башкортстан Республикасы дәүләт идарә­сенең санлы үсеш министры урынбасары Рөстәм Хәмәтвәлиев сөйләде. Рөстәм Флюр улы белдерүен­чә, дистанцион укыту чорында Интернет белән бәйле 500гә якын мөрәҗәгать килгән. Санлы үсеш, Мәгариф һәм фән министрлыгы белгечләре, Интер­нет операторларыннан торган эшлекле төркем тарафыннан мондый гаризаларга тиз арада җавап бирелгән һәм проблемалар кыска вакытта хәл ител­гән. Ведомство вәкиле шушы вакыт эчендә республикада Интернет белән бәйле җитди авария­ләр күзәтелмәвен ассызыклады. Республикада 1210 мәгариф оешмасы исәпләнә. 2019 елда – 215, 2020 елда – 425 объект Интернет челтәренә тоташтырылган, агымдагы елда алар 570 булачак. Шул рә­вешле, төбәкнең һәр мәктәбендә югары тизлекле Ин­тернет булачак. Шәһәр мәгариф оешмаларында ул – секундына 100 Мбит, ә авылларда 50Мбит булачак.

Ризык бала өчен хәвефсез һәм файдалы булырга тиеш
Мәктәпләрдә туклануны оештыру буенча килгән сорауларга төбәкнең сәүдә һәм хезмәтләр күрсәтү министры Алексей Гусев җавап бирде. Ведомст­во җитәкчесе ассызыклавынча, республика белем бирү учерждениеләрендә туклануны оештыру җитди контрольгә алынган, даими тикшерелеп тора. Бу җәһәттән төбәктә туклануны оештыру буенча бердәм стандарт булдырылган. Ул чимал сатып алуга, менюга (өч төрле меню тәкъдим ителә) һәм азык-төлекнең сыйфатына кагыла.

Республика Башлыгы Радий Хәбиров башлангычы белән балалар менюсында үзебездә җитеш­терелгән продукция өлешен арттыруга зур игътибар бирелә. Әгәр 2019 елда мәктәп туклануында республикада җитештерелгән ит өлеше 10 процент булса, бүгенгә итле ри­зыкларның 80 проценты үзе­бездә җитештерелгән иттән әзерләнә.

Мәктәп ашханәсендә ризыкның тәмле булмавына зарланучыларга ведомство җитәкчесе болай җавап бирде:
— Иң мөһиме, ризык бала өчен хәвефсез һәм файдалы булырга тиеш. Аны әзерләү буенча та­ләпләр бик катгый. Азык бары тик пешерелә, бернинди кыздыру юк. Балаларга әзерләнгән ризыкка тәмләткечләр салынмый, шуңа да ул өйдә әзерлән­гәннән күпкә аерыла. Без укучыларның сәламәтлеген кайгыртабыз, тәм-томны өйдә дә ашарга була, — диде Алексей Гусев.

Укучыларны вакциналау көтеләме?

Мәктәп укучыларын коронавирустан вакциналау якындагы айларда каралмый, дип белдерде сәла­мәтлек саклау министры урынбасары Игорь Засядкин. Аның сүзләренә караганда, бу этапта вакциналау каралмаган, чөнки балалар җиңел авырый, аларда авыру еш кына симптомсыз үтә. Халыкның өлкән категорияләрен вакциналау күпкә өстенлекле булып тора.

Җыелышка килгән сораулар буенча ата-аналарның фикерләре аерылды — аларның бер өлеше балаларны вакциналаштыруны көтсә дә, күпчелеге каршы чыга.

Тематик шимбәләр кире кайта

Башкортстан мәктәпләрендә тематик чаралар яңадан уздырыла башлады. Мәгариф һәм фән министры Айбулат Хаҗин билгеләвенчә, 2019 елда “Мәгарифтә күтәрелеш” беренче мәгариф форумында биш көнлек укуга күчәргә, әмма айга бер тапкыр мәктәпләрдә спортка, тарихка, фәнгә багышланган тематик шимбәләр үткәрергә карар ителгән иде.

Кече сыйныфлар өчен бу — кагыйдә буларак, урамда спорт бәйрәме, урта сыйныф укучылары өчен — мәктәпләрдә өстәмә дәресләр һәм сыйныф сәгатьләре, өлкәннәр өчен — профориентация дәресләре. Чараларга бару мәҗбүри.
Айбулат Хаҗин белдерүенчә, БДИга гариза тапшыру өчен бер атна калды, димәк, вузга керү өчен кирәкле фәнне сайлау зарур. Министр белдерүенчә, шуңа бәйле рәвештә, чыгарылыш сыйныф укучыларын шимбә көнне Башкортстан вузлары белән таныштыруны оештырырга карар ител­гән.

Министр да, җыелышның модераторы булган Дәүләт җыелышы-Корылтай депутаты Раил Әсә­дуллин да чыгарылыш сыйныф укучылары республика вузларын сайлаячагына ышаныч белдерделәр. Моңа нигез буларак, алар 2021 елда бюджет урыннары саны 2000гә артуын һәм мәктәпне тәмамлау­чылар санына якынлашуын атадылар.