Барлык яңалыклар
Төрлесеннән
12 июль 2018, 18:06

Капиталь ремонт программасы – хәрәкәттә

Былышлы авыл Советының Янбахта разъезды авылында күпфатирлы йорт түбәсен алыштыру эшләре ахырына якынлаша. Бу вакыйганы анда яшәүчеләр бик озак көтте.

— Йорт түбәсе “Күпфатирлы йортларны капиталь ремонтлау” төбәк программасы кысаларында ремонтлана. Подрядчысы – “Система” ҖЧҖ, — ди район хакимияте башлыгының төзелеш, архитектура, транспорт һәм элемтә буенча урынбасары Таһир Мостаев. — Бу районда әлеге программа буенча ремонтланган тугызынчы йорт.

Фатир хуҗаларының шатлыгын аңларга мөмкин, чөнки 1970нче еллар башында төзелгән йортта бер тапкыр да капиталь ремонт ясалмаган.

— Дүрт ел элек үзебезнең көч һәм тырышлык белән су һәм канализация торбаларын, бераз соңрак подъезд тәрәзәләрен һәм ишекләрен алыштырган идек. Ә менә искереп беткән түбә аркасында күңелсезлекләр аз булмады. Шуңа, “Күпфатирлы йортларны капиталь ремонтлау” программасына кертүләрен белгәч, бик сөендек. Түбәне яңарткач, йортыбыз бөтенләй үзгәреп китәчәк, — ди йорт буенча җаваплы Лидия Халикова.

Айсылу ХӘСӘНОВА.

С.Константинов фотосы.