Игорь Баринов: "Башкортстан - күпмилләтле гаилә"

Аның фикеренчә, ирекле рәвештә Русия дәүләтенә кушылган башкорт халкы туган ил язмышы хәл ителгәндә мотлак Ватан сагына баса.

— Башкорт атлы полклары Минин һәм Пожарский ополчениесе составында урыс армиясе сафларында сугышкан, 1612 елда Мәскәүне Польша интервентларыннан азат итүдә катнашкан, — диде Игорь Баринов. — Аларның роле 1812 елгы Ватан сугышында да бик зур була, анда 28 башкорт полкы катнашкан, шуларның тугызы Парижга бәреп керә. Бөек Ватан сугышы фронтларында 60 мең башкорт сугышкан, аларның 300гә якыны Советлар Союзы Герое исеменә лаек булган. Шуларның берсе — хәрби очучы Муса Гәрәев — ике тапкыр. 35 кеше Дан орденының тулы кавалеры булган. Сугыш вакытында Башкортстанга 100дән артык сәнәгать предприятиесе, дистәләгән госпиталь, үзәк дәүләт органнары, 200 меңнән артык качак эвакуацияләнә. Республикада яшәүче барлык милләт халыкларының бердәнбер бурычы дошманны җиңү була.

Игорь Баринов белдерүенчә, нәкъ милләтара дуслык һәм татулык Башкортстанга Русиянең терәк төбәкләренең берсе булырга мөмкинлек бирә.

Чыгышы ахырында ул республика җитәкчесе Радий Хәбировка рәхмәт әйтте һәм аның бу вазыйфадагы беренче көннәрдән үк дәүләт милли сәясәте бурычларын хәл итү өчен күп нәрсә эшләвен ассызыклады.