Дуслык авыр вакытта сынала

18 гыйнварда Башкортстан Республикасы Башлыгы вазыйфасын вакытлыча башкаручы Радий Хәбиров белән Кырым Республикасы Башлыгы Сергей Аксенов­ның ике яклы очрашуы үтте. Аннары киңәйтелгән составта очрашу булды.

— Сергей Аксенов, Сибайда гадәттән тыш хәл килеп тууын белгәч, 500 баланы Кырымда бушлай ял итәргә, саф һава суларга чакырды. Дуслык авыр вакытта сынала. Моның өчен зур рәхмәт Сезгә, — диде очрашуда Радий Хәбиров.

Кырым җитәкчесе Сергей Аксенов җавап сүзендә билгеләп үткәнчә, балаларга Кырымда ошарга тиеш һәм Башкортстанның барлык халкы да үзләрен биредә туган йортларындагы кебек хис итә ала.

— Без Башкортстан тарафыннан барлык юнә­лешләр буенча да даими ярдәм тоябыз. Республика Белогорск районына бик күп ярдәм итә. Мондый дуслык һәм уртак эш – Русиянең барлык төбәкләренең уңыш нигезе, — диде Сергей Аксенов.

Кырым җитәкчесе Сергей Аксенов шул ук көнне Дуслык ордены белән бү­ләкләнде. Тиешле указга Башкортстан Башлыгы вазыйфасын вакытлыча башкаручы Радий Хәбиров кул куйды. Бүләкләү тантанасы ике республика делега­цияләре очрашуы вакытында узды.

***

Быел Кырымда “Юбилейный” шифаханәсен реновацияләү башланачак, ул Башкортстанга 2017 елның сентябрендә тапшырылган иде. 2021 елда реконструкция тәмамлан­ганнан соң, Башкортстанның Кара диңгез ярында ял итү һәм дәвалану өчен нә­тиҗәле инфраструктуралы 400-500 урынга исәпләнгән заманча шифаханәсе бар­лыкка киләчәк.

“Юбилейный” шифаха­нәсе директоры Ренат Галимов Башкортстан һәм Кырым делегацияләренең очрашуы вакытында яңа корпуслар төзеләчәге турында сөйләде. Рено­вациягә 800 миллион сум акча тотыну планлаштырыла. Быел ике һәм өч катлы корпусларда һәм ашханәдә капиталь ремонт үткә­реләчәк.

“Икенче этапта санаторийда бассейн, термаль сулар белән заманча дәвалау-сәламәтләндерү комплексы барлыкка ки­ләчәк. Ул хәзерге заман дәвалау-диагностика методикаларын куллануга, спа-процедуралар һәм фитнес белән шөгыльләнүгә исәп­ләнгән. Рекон­струкциядән соң шифаханә ел әйлә­нәсенә эшли алачак”, —диде Ренат Галимов.

“Юбилейный” — балалар һәм ата-аналар өчен клиник кардиология шифаханәсе. Ул кан әйләнеше системасы, югары сулыш юллары һәм шуңа бәйле патология авырулары булган балаларны дәвалау һәм реабили­тацияләү белән шөгыль­ләнә. Ул Евпаториянең санатор-курорт зонасында, Кара диңгез ярыннан 30 метр ераклыкта, матур парк янында урнашкан. Хәзер ул совет чорында төзелгән торак һәм хуҗалык корпусларыннан тора. Биналар гына түгел, бөтен территория, инженерлык, челтәр һәм дәвалау инфраструктурасы да реновация таләп итә.

* * *

Кырым Республикасы Министрлар Советы Рәисе урынбасары Михаил Селезнев Башкортстан Хөкүмәте вице-премьеры Илшат Таҗетдинов озатуында керамик плитә җитештерү буенча Европада иң эре заводларның берсе – “Lasselsberger Ceramics” эше белән танышты.

Аның куәте – елына 10 миллион квадрат метр плитә. 12 ел эшләү дәверендә заводка 3 миллиард сумнан артык инвестиция салынган. Компаниянең планнарында — еллык җитештерүне һәм инвестицияләр бюджетын 1,5 тапкыр арттыру. 5 миллион квадрат метр күләмендә яңа җитештерү куәте проектлана. Төзелеш-монтаж эшләрен 2020 елда тәмамлау планлаштырыла. Бүгенге көндә завод ел саен 9 миллион квадрат метр керамик плитә һәм керамогранит җитештерә, заводта 500дән артык хезмәткәр эшли.

Әбҗәлил районында компаниянең тагын бер эре инвестпроекты — коры төзелеш катнашмалары җитештерү буенча завод төзү гамәлгә ашырыла. Проектның беренче этабын гамәлгә ашыру кысаларында инвестицияләр күләме 2 миллиард сумнан артып китәчәк, 220 эш урыны булдырылачак. Яңа заводта беренче продукцияне 2020 ел уртасында чыгару планлаштырыла.

* * *

Алла Пашкунова Уфа шәһәренең 161нче лицеенда булды. Кунакларны Башкортстанның мәгариф министры урынбасары Илдар Мәүлетбирдин, Уфа шәһәре хакимиятенең мәгариф идарәсе башлыгы Елена Хаффазова, Дим районы хакимияте башлыгы урынбасары Алисә Гыйбадуллина, Дим районы мәгариф бүлеге начальнигы Ирек Усманов, 161нче лицей директоры Гөлнара Гыймазетдинова каршы алды.

Кунаклар укуны оештыру белән танышты, уку сыйныфларын, интерактив кабинетларны, нәшрият үзәген, бассейнны, шахмат зонасын карады. Кунакларга шулай ук кадет класслары һәм лицейның хәвефсезлек системасы турында сөйләделәр.

Алла Пашкунова 161нче лицейда балаларга сыйфатлы белем бирү өчен барлык шартлар да тудырылуын билгеләп үтте.

* * *

Шул ук көнне Сибайга эш сәфәре барышында Башкортстан Башлыгы вазыйфасын вакытлыча башкаручы Радий Хәбиров һәм Кырым Республикасы Башлыгы Сергей Аксенов Учалы тау-баектыру комбинатының Сибай филиалы карьерында булдылар. Шулай ук, Радий Хәбиров белән Сергей Аксенов үзәк шәһәр дәвахасенең бала тудыру йортында булдылар. Төбәкләр җитәкчеләре медицина хезмәткәрләре, бала тудыручы хатын-кызлар белән аралаштылар, табиблар, медикаментлар, җиһазлар белән тәэмин ителеш белән кызыксындылар.