Уфа — экологлар башкаласы

Чараны үткәрүдә Уфа шәһәре хакимияте ярдәм күрсәтте. Аны ачу тантанасында Башкортстан Башлыгы Рөстәм Хәмитов, Хөкүмәт һәм төрле министрлык, ведомство җитәкчеләре катнашты.

Мәртәбәле чараның Башкорт­стан­ның башкаласы Уфада үт­кәрелүе очраклы түгел, чөнки республикада соңгы унъеллыкларда экология мәсьәләләренә дәүләт дәрәҗәсендә зур әһәмият бирелә. Әйләнә-тирә сафлыгы, сәнәгать пред­приятиеләренең экологик хәвефсезлеге проблемалары буенча республикада ил күләмендә игътибарга лаек чаралар тормышка ашырыла. Быел да яшәеш һәм эшчәнлектәге экологик мәсь­әләләр буенча илнең билгеле галимнәре, белгечләре Уфада фикер алы­шачак, көн кадагындагы мәсьәлә­ләргә кагылышлы проблемаларны караячак.

Форумда катнашучыларны Башкортстан Башлыгы Рөстәм Хәмитов сәламләде һәм чыгыш ясады.

— Экология һәм икътисад яшәешебездә, эшчәнлегебездә һәрвакыт янәшә йөри. Башкорт­станда әйләнә-тирә сафлыгы, чиста мохит турында сүз алып барганда беренче чиратта, әлбәттә, кешеләр сәламәтлеге, табигатьне саклау күз уңында тотыла. Билгеле, бигрәк тә эре сәнәгать предприятиеләре эшчәнлегендә кайбердә экологик проблемалар очрый һәм без аларны һәрвакыт тиз һәм кешеләр сәламәтлегенә зыян китермәстәй чаралар белән хәл итәбез. Эко­ло­гиягә зыян китерүче пред­приятиеләр эшчәнлегенә, гомумән, юл куярга ярамый. Бу – безнең принципиаль позиция, — диде Рөстәм Зәки улы.

Төбәк башлыгы халыкара форумда катнашучыларны соңгы 10-15 елда Башкортстанда экология сафлыгын тәэмин итүгә юнәлтелгән чаралар белән таныштырды. “Газпром нефтехим Салават” пред­приятиесе, мәсәлән, әлеге максатларга 100 миллиард сумнан артыграк акча тотынган. “Башнефть”, “Затон ТЭЦы” һәм башка мөһим объектларда да күләмле эшләр башкарылды.

Рөстәм Хәмитов республикада төзелүче барлык объектларда да эшнең экологик экспертизадан башлануын ассызыклады.

— 2024 елга кадәр Русия Президенты Владимир Путин индустри­аль үсешкән эре шәһәрләрдә атмосферага зарарлы матдәләр таралуны әлеге күләмнән 20 процентка кадәр киметү бурычын куйды. Уфа пычранучы шәһәрләр исемлегенә керми. 2030 елга кадәр Башкортстанны социаль-икътисади үстерү программасында да “Яшел экология” мәсьәләләренә зур игътибар биреләчәк, — диде Рөстәм Хәмитов.

Чара кысаларында республика Башлыгы күргәзмә экспозицияләре, анда катнашучы предприятиеләр тәкъдим иткән яңалыклар белән танышты.

Экологик форумда ике дистәдән артык төрле юнәлеш­тәге чара, шулай ук, тоташ ил күлә­мендәге экологик мәсьә­­ләләрне – эчәр суны чистарту, сәнәгать калдыкларын эшкәртү, шәһәр мохитендәге экологик хәвеф-сезлекне тәэмин итү мәсьәләләре буенча фикер алышуда эшлекле мәйданчыклар эшләячәк. Күргәз­мәдәге төп чара­лар­ның берсе – “Иң яхшы заманча технологияләр: экология һәм икътисад” дигән темага пленар киңәшмә.

Башкортстан Күргәзмәләр компаниясе җитәкчесе Альбина Килдегулова сүзләренә караганда, форумда ике дис­тәгә якын эшлекле чара үткәрү планлаштырыла. Программаларда 100дән артык спикер һәм модераторның катнашуы көтелә. Алар арасында Хөкүмәт, төбәк дәүләт власте органнары, әйдәүче галимнәр, табигать һәм экология эшчәнлеге белән бәйле җәмәгать оешмалары вәкилләре чыгыш ясаячак.

“Экология. Технологияләр. Тормыш” күргәзмәсе дә халыкара чараның мөһим өлеше булып тора. Анда Русия­нең унга якын төбәгеннән 70тән артык компания катнашырга теләк белдергән. Әлбәттә, күргәзмәдә иң зур урын Башкортстан Республикасына бүленгән. Шулай ук, Мәскәү өлкәсе, Санкт-Петербург вәкилләре форумда катнашучылар игътибарына үзенчәлекле экспонентлар тәкъдим итә. Күргәзмә берничә өлешкә бүленгән. “Экопром” бүлегендә, мәсәлән, “Тыюлыклар” экспозициясе Баш­кортстанның дүрт табигый паркын һәм өч тыюлыгын тәкъдим итә.

Халыкара форумда уникаль осталык дәресләре, семинарларда диетологларның консультацияләре дә башкала кунакларын җәлеп итәр, дип ышана чараны оештыручылар.

Әлбәттә, мәртәбәле чараның максаты — кешеләрнең игътибарын илебезнең табигый байлыкларын саклауга җәлеп итү, әйләнә-тирә сафлыгын тәэмин итүгә уңай караш тәрбияләү һәм кешеләрдә экологик аңны үстерүгә булышлык итү.