Рөстәм Хәмитов: “Башкортстан – транспортны газификацияләү буенча илдә алдынгылар исәбендә”

Бу хакта Башкортстан башлыгы Русия нефть-газ-химия сәнәгате форумының пленар утырышында сөйләгән чыгышында белдерде.

– “Газпром”ның Башкортстан җирендә урнашкан предприятиеләре белән берлектә бу өлкәдә зур эш тормышка ашырыла, – дип билгеләде Рөстәм Хәмитов. – Бүген бездә автомобильләр өчен тәгаенләнгән 15 газ тутыру компрессор станциясе эшли. Якын арада тагын 5 шундый заправка төзеләчәк. Дүрт меңнән артык транспорт чарасын берләштергән йөк ташу оешмалары, автобус һәм таксомотр парклары, инде хәзердән үк табигый ягулыкта эшли. “Русия тимер юллары” компаниясе белән дә әлеге юнәлештә эш алып барыла.

Әйткәндәй, газ ягулыгын куллануны үстерү мәсьәләсе Русия Президенты Владимир Путинның күптән түгел Русия Хөкүмәте әгъзалары белән үткәргән киңәшмәсендә каралган иде.