һәр мәсьәлә власть контролендә

Башкортстан Башлыгы Рөстәм Хәмитов гражданнарны кабул итте. Ике сәгать дәвамында халык белән социаль өлкә, инфраструктура һәм туризмны үстерү мәсьәләләрен тикшерде. Нәтиҗәдә, Хөкүмәткә, министрлык һәм ведомстволарга тиешле бурычлар йөкләтелде.

Бөрҗән районы кешеләре республика Башлыгына яшь гаиләләр шәхси торак төзелеше өчен җир участогы алганда килеп туган проблемалар турында сөйләде. Мондагы җирләрнең күпчелек өлеше урман фондына карый.

Урманчы Ирек Шәрәфетдинов урман фонды җирләрен файдалануны гадиләштерү өчен федераль законга тиешле үзгәрешләр кертүне тәкъдим итте.

Рөстәм Хәмитов Хөкүмәткә һәм район хакимиятләренә федераль власть органнары белән берлектә әлеге мәсьәләне хәл итү юлларын уйларга кушты, шулай ук, Дәүләт җыелышы-Корылтайга закон башлангычы белән чыгуны йөкләтте.

Уфа дәүләт авиация техник университеты преподавателе Любовь Беляева республика җитәкчесенә Уфа районының Урыс Юрмашы авылы халкы мөрәҗәгате белән килде. Аның сүзләренә караганда, төп проблема транспортка бәйле. 2006 елда Юрмаш – Баранцево тимер юлының 37нче чакрымындагы кичү ябыла. Авыл халкы 4 чакрым читтәрәк урнашкан бердәнбер юлдан йөрергә мәҗбүр. Ул хәвефсезлек таләпләренә җавап бирми. Моннан тыш, биредә товар поездлары еш туктый.

Рөстәм Хәмитов Хөкүмәткә, Уфа районы хакимиятенә Куйбышев тимер юлы җитәкчелеге белән берлектә чыгу юлын ачу буенча план әзерләргә кушты.

Салават районында яшәүче Алия Гыйльметдинова Лаклы авылында тирә-як мохитне саклау буенча контрольне катгыйлатуны сорады. Аның сүзләренә караганда, урындагы табигать туристларны җәлеп итә. Әй елгасы ярында урнашкан авыл янында алар палаткалар кора, учак яга, үзләреннән соң чүп-чар калдыра. Авыл халкы үз көче белән территорияне чүп-чардан тазартырга мәҗбүр була. Моннан тыш, биредә ял итү өчен шартлар тудырылмаган.

Төбәк Башлыгы Хөкүмәткә һәм район хакимиятенә биредә туризмны үстерү программасында каралган чараларны гамәлгә ашыру буенча эшне активлаштырырга кушты.

Архангель районында яшәүче Айгөл Усманова республика җитәкчесе белән төбәктә авыл хуҗалыгы кооперацияләрен үстерү мәсьәләләрен тикшерде. Берничә ай элек ул биш районның крестьян-фермер хуҗалыклары башлыкларын берләштерүче “Тамыр-102” авыл хуҗалыгы кулланучылары кооперативы оештыра. Кооператив терлек, атлар үрчетү, шулай ук, ит, деликатеслар җитештерү белән шөгыльләнә.

Очрашу барышында Айгөл Усманова хуҗалыкның киләчәк планнары турында сөйләде һәм республика Башлыгыннан җитештерүне үстерү өчен грант алуда булышлык итүен сорады. Рөстәм Хәмитов Хөкүмәт вице-премьеры, авыл хуҗалыгы министры Илшат Фазрахмановка грант бирү механизмнарын аңлатырга һәм дәүләт ярдәме күрсәтүнең башка ысулларын карарга кушты.